ريفيو ماسك ، كريم ، زيت المكاديميا | MACADAMIA mask , oil , cream Review
السلام عليكم ورحمة الله :)
تدوينة جديدة اليوم بإذن الله . وراح ابدأ من اليوم كل أحد إذا ربي كتب انزل تدوينة جديدة .
خليكم قريبين كل احد :) ..
بوست اليوم من زمااان كان ودي انزل لكم عنه ، حمدلله جا الوقت اللي اتكلم فيه عن منتجات مكديميا .
بعد الصيت عليها ومدح وذم البعض حبيت اختبرها بنفسي واختبرتها مدة كافيه :)
قبل ما أبدأ :
نوعيه شعري جاف جداً ، فرزي ، كيرلي .
اللي يناسب معي ممكن مايناسب معك ، سوي سيرش بالنت عن المجموعه وشوفي اراء غيري ممكن احد نفس نوع شعرك
بيعطك ريفيو افضل :) .
بسم الله /
الماسك Deep Repair Masque /
اول شئ اقتنيته من المجموعه كان الماسك .
طريقة استعمالي /
استعمله مره كل اسبوعين ، بعد الشاور انشف شعري بالفوطه شوي ثم احطه واقعد ١٠ دقايق بعدين اشطفه .
ملاحظتي /
نعم شعري ، هبط لي الشعشره او الفرزي اللي بشعري كثير ، تساقط فضيع .
في بداية تجربتي طبعاً ما حبيته ليش لانه سبب تساقط لشعري !!! طيب ليش تساقط
لأني مع كل اسف كنت احطه (بجذور شعري ) لين اطراف شعري . وهذي مشكله عظيمه وخطأ كبير .
بعد ٤ مرات استعمال في جذور الشعر لين الاطراف وملاحظة التساقط بكل مره ، لين ايقنت ان الماسك السبب .
فكرت بسبب التساقط وايقنت ايش هو على طول الماسك منتج ثقيل مره مره ، والماسك او البلسم او الكريم بشكل عام خطأ ينحط بالفروة او بجذور الشعر .
بعدها صرت استعمله بأطراف شعري وفعلاً التساقط وقف .
المنتج رائع حبيته جداً .
ينعم يطري ويهبط الشعر ، اطراف شعري لما احطه احسها صحيه ، والاحلى يخلي شعري فيه لمعه .
حبيته جداً ، بس طبعاً نتيجته تبان بنفس الشاور اللي حطيتي فيه الماسك واللي بعده وبعدين خلاص .
قوامه /
للاسف خلص وماصورت قوامه .
قوامه غريب ثقيل ولزج شوي ، نفس هالصوره اخذتها من النت .
ارجع اشتريه او لا /
اكيد ايه .
زيت الشعر Healing Oil Treatment /
ريحته حلوه مره ، عطريه نوعاً ما .
طريقة استعمالي /
احطه بعد الشاور وشعري شوي رطب ، او وشعري ناشف امسح عليه لو كنت ابغى او مثلاً حسيت الكيرلي بشعري فرزي شوي .
جربت حركة زهرة الليلك قالت اخلطي الزيت مع الماسك وحطيه بشعرك ، حبيت الطريقة بس النتيجه نفس نتيجة الماسك مع لمعه زيادة بالشعر .
ملاحظتي /
يخلي شعري ناعم وويخفف الفرزي بشكل ملحوظ ، مايسبب تدهين بالشعر ابداً .
حبيته جداً ومرتاحهه معاه .
قوامه /
زيتي بس ثقيل شوي .
نفس الصوره اللي تحت على اليسار .
ارجع اشتريه او لا /
ايه .
الكريم Nourishing Leave-In cream /
كريم للشعر .
طريقة استعمالي /
احطه وشعري جاف وغالباً لما يكون على طبيعته كيرلي احط منه ينعم الكيرلز شوي .
ملاحظتي /
اول ماحطيته حسيت شعري كأني حاطه فيه عسل يلزق بس نشف الكريم بالشعر يروح هالاحساس .
ينعم ويهبط الشعر شوي بس نتيجته مو احترافيه .
قوامه /
مو ثقيل مره متوسط الثقل .
نفس الصوره اللي تحت على اليمين .
ارجع اشتريه او لا /
لا .
مكان الشراء /
نزيه
اسعارهم /
اغلب منتجاتهم حدود ١٥٠
قولوا لي رايكم فيها لو جربتوها ، واذا ماجربتوها هل راح تجربونها او لا ؟
يعطكم العافيه :)
مع السلامه ..
