السلام عليكم ورحمة الله
تدوينة اليوم فريده من نوعها بتكلم عن آخر خمس كتب قرأتها :)
وبإذن الله بصير كل ماخلصت مجموعة كتبت كتبت لكم تدوينه عنها واذا انصح فيه او لا .
أول كتاب هو كتاب (كخه يابابا) للكاتب : عبدالله المغلوث .
الكتاب يهتم بنقد الظواهر الاجتماعيه ٫ جميل حبيته لانه ممتع وخفيف وسلس خلصت قرآئته في ٤ ساعات ماشاءالله D:
الكتاب يتكلم عن ظواهر سلبيه في مجتمعنا وينقدها بصورة ايجابيه ممتعه .
( حكايا سعودي في اوروبا ) للكاتب : عبدالله الجمعة .
كتاب قصص حاصله للكاتب اثناء تجوله في انحاء اوروبا .
شريت الكتاب لسببين ٫ الاول لاني احب اسلوب عبدالله الجمعة في السرد واستمتع لما ادخل حسابه على تويتر سرده لقصص حياته جميل وممتع استمتع لما اقرأ تغريداته .
والثاني لاني ابحث عن كتاب حقيقي يسرد فيه الكاتب قصة حياته ويكون ممتع وباسلوب شيق مثل اسلوب الكاتب عبدالله الجمعة .
الكتاب احتوى على تفاصيل ما كان لازم يقولها وايضاً قصص ممله بس الغالب عليه انه كتاب لطيف وجميل .
اكثر قصص استمتعت فيهم هي (ضياع في الغابه ، الوكر ، الرسالة المفقودة ، الحُمى ، دموع يتيمة )
(بوب موب عمي) للكاتب : وليد الشعلان .
الكتاب عبارة عن روايه لفتاة اسمها جوزاء والفتى اسمه خالد ، مبتعثين احبوا بعض بس واجهتهم مشاكل وهي ان اب جوزاء واب خالد أعداء بسبب مشاكل قديمه ، حياتهم من الطبقة المخملية المنفتحه جداً .
روايه جميله وخفيفه قريت نصفها لما كان ينزل الرواية في مدونته .
الروايه نهايتها مؤسفه خلتني اندم اني قريتها هههه نصر الظُلم نوعاً ما .
اخر روايتين مرتبطين ببعض اللي هم
(احببتك اكثر مما يتبغي ) + ( فلتغفري ) للكاتبه : أثير النشمي
اسلوب طرحها غريب هي روايه بس طرحتها باسلوب المذكرات والتفكير الوصفي .
روايه حب بين فتاة تدعى جمانه وفتى يدعى عبدالعزيز . غامضه نوعاً ما ، علاقتهم تنرفز جمانه نقيه راقيه هادئه صايره فتاة كامله تقريباً وعبدالعزيز ماراح اوصفه لانه انسان سيئ بمعنى الكلمه ولا يستحق جمانه مثل ماهو مفروض . بس بما ان جمانه ضعيفه جداً فقدرت تستسلم له وتحبه وهذا مع الاسف نرفزني ههههه .
(احببتك اكثر مما يتبغي )
الكتاب الاول طرح من طرف جمانه ، جميل الكتاب رغم انه كبير وصفحاته كثيرة بس حبيته خلصته في أسبوع ممتع سلس ومحمس ، اسلوب الطرح رائع جداً حبيته .
( فلتغفري )
الكتاب الثاني طرحت نفس الروايه بس هالمره من طرف عبدالعزيز ، ما تحمست معه افتحه اقراء كم صفحه ثمن اسكه لانه اعاده لنفس الاحداث بالكتاب الاول بس من وجهة نظر اخرى وفيه بعض الحقائق اختفت بالكتاب اللي قبل وظهرت هنا وضحت اشياء تساءلنا عنها بالكتاب الاول واخفاها عبدالعزيز بس بهالكتاب ولانه هو اللي يتكلم فعرفنا كل شئ .
زي ماقلت لكم الكتاب عبارة عن مذكرات هنا كثرت كثير المذكرات والافكار اللي من خيال عبدالعزيز وحديث عبدالعزيز لنفسه .
ماتحمست معه يالله كملته كنت اقراء بسرعه واطمر اسطر واتعدى صفحات لانها كانت لاحداث مكرره اعرفها فاتعداها .
الكتاب هذا مكمل للاول بس كاسلوب طرح ما حبيته يمكن لان الكاتبه فتاة وصفت مشاعر فتى وماقدرت انسجم زي الكتاب الاولى فتاة توصف مشاعر فتاة اللي اقرب ماتكون مشاعرها .
هذي حصيلتي هالمره ، متحمسه ابدأ اقرأ الكتب الخمس الاخرى اللي بإذن الله بخلصها قبل ما تنتهي ٢٠١٤ .
يعطيكم العافيه ، اذا قريتوا احد الكتب اللي فوق قولوا لي رايكم فيها واذا عندكم كتب تنصحوني فيها اكتبوها لي :)
شكراً .
1 التعليقات:
شكراً لتعليقك ..