المرانغ | Meringue

السلام عليكم ورحمه الله 
بتكلم اليوم عن موضوع جداً مهم اللي هو المرانغ ..

اول شئ وشو المرانغ ؟

المرانغ رغوة ، الرغوة هاذي تكونت من الخفق المستمر والسريع
لبياض البيض .

ليش بياض بيض ؟

ينفع الصفار اكيد لا ولو بياض البيض صار فيه شوية صفار راح تكون
عندنا مشكله عويصه وراح يخرب المرانغ !
بياض البيض عباره عن ماء وبروتين اللي هم المكونين الاساسيين للمرانغ بشكل عام .
وزي ما نعرف بياض البيض خالي من الدهون وهاذي نقطه مهم لتكون المرانغ
الدهون عدو المرانغ لان الدهون يسبب للبروتين خلل في ترابط
وتكوين الفقاعات وهاذي مشكله لان بدون الفقاعات مافي رغوة ولا بيتكون الميرانغ .

طيب كيف اسوي ميرانغ !!

زي ماسبق وذكرت الميرانغ اساسه بياض بيض ، وايضاً السكر .
بس في حالات نستبعد السكر لما نبغى نسوي شئ مالح مثل التشيز سوفلية
اللي راح انزل فيديو عنه مستقبلا في القناة :)
وممكن نحط نشأ الذرة بس نشأ الذرة غالباً يكون في السكر :)
وممكن نحط جيلاتين راح تخلي قوام الميرانغ اقوى :)

اول حاجة للميرانغ 3 انوع ؟ 

(الفرنسي ، الايطالي ، السويسري )
فالثلاث انواع كلهم راح نستخدم بياض بيض وسكر
بس الفرق كبير .

الفرنسي : راح نخفق بياض البيض مع شوي سكر لحد مايتكون لنا ميرانغ .
الايطالي : راح نذوب السكر على النار مع ماء علشان يتكون لي (شيره) بعدين نخفقه
مع بياض بيض لحد مايتكون لي ميرانغ .
السويسري : نحط البيض بحمام مائي دقائق لحد مايدفئ ثم نتركه يبرد بحرارة الغرفة بعد كذا نفصل بياض البيض
بعدين نخفقه مع السكر لحد مايتكون لي ميرانغ .

*الايطالي والسويسري اكثر ثبات من الفرنسي لان في كلاهم احد المكونين تعرض للحرارة العالية قبل خفقه . 
بس انا اشوف الفرنسي اسرع يعني مايحتاج وقت علشان تسوينه D:

الطريقة :

اول شئ حسب الطبق اللي راح تستخدمينه فالمرانغ حددي النوع فرنسي ايطالي سويسري
المعايير ايضاً تحدد حسب الطبق لان في اطباق زي ماسبق وقلت ماتحتاج سكر مثل التشيز سوفليه
وفي اطباق العكس تحتاج اكثر سكر مثل تغطية الكيك (الكريمة) .

اهم نقطه بتكلم عنها تأثر بنجاح المرانغ بشكل كبير :

هي الصحن اللي راح تستخدمينه اثناء الخفق :/ ايوا الصحن يأثر 100% في النجاح
راح اقول لكم انواع الصحون الافضل للاسواء ....

النحاس = افضل افضل خيار اذا بتدفعين مبلغ بصحن نحاس علشان المرانغ فبيكون المرانغ ناجح جداً ومنتفش .
الستانلس = افضل خيار والمرانغ ناجح معه :) سعر جميل ومتوفر بكل مكان .
القزاز = ما افضله بس ممكن تستخدمينه اذا اضطريتي هههه راح يكون المرانغ اسفل الصحن بالتالي راح يصعب عليك الخفق .
الالمنيوم = ينفع بس ما انصح فيه لانه راح يتفاعل البروتين مع الالمنيوم ويسبب لون في المرانغ وطعم ! مصيبه D:
البلاستك = اسواء خيار ابتعدي عنه جداً ماراح ينفش المرانغ والسبب انو اكيد البلاستك راح تكون فيه نسبئة لو كانت ضئيلة من الدهون
لان مستحيل ينظف 100% مع الغسل والدهون زي ماقلت العدو اللدود لبروتين .

الهدف من المرانغ فالكيك او غيره انه ينفش لي الكيكه مثلاً السوفليه ماراح يكون منتفش الى لما يكون
موجود مرانغ وكمان قوام المرانغ ممتاز :)

اثناء الخفق :

فيه خطوات لتكون المرانغ راح افصلها لكم .

1* تكون الرغوة الخفيفه بهالمرحله حطي السكر .
2* يبدأ يجمد ويكون رؤوس لينه ، لما ترفعين الخفاقه راح يميل المرانغ .
3* راح نوصل لمرحلة الرؤوس الصلبة وتسمى منقار الطير ، يعني لما ترفعين الخفاقه قوام الرؤوس قوي ماتميل
وايضاً لو قلبتي الصحن ماراح ينكب D: *لاتجربونها وتحوسون الدنيا ههههه *
بهالمرحله تكون المرانغ وقفي خفق ولا تزيدي ..

لو زدتي راح يفسد المرانغ ويكون عندي خطوة فاشله
الخطوة رقم 4* راح يتكتل ويبدأ يطلع مويه ، راح يكون المرانغ سائل يعني خلاص خرب :(
مهم تركيز اثناء الخفق
يعني ماتشغلين الخفاقه وتروحين D:

وين ممكن تستخدمين الميرانغ ؟

الميرانغ بمعناه العام للحلوى ممكن يستخدم فالمالح بس نادر
وله استخادمات كثيره اهمها * السوفلية اللي ماينجح بدونه


* ممكن نسوي منه كوكيز يعني نصفه بصينيه ونجففه بالفرن ويكون لي كوكيز مرانغ !

* استخدميه بخلطة الكيك ! او ممكن اسوي منه تغطية الكيك .


*وفي اكلة مبتكرة جميلة انك تغلفين ايسكريم بميرانغ سويسري وتدخلينه الفرن
لحد مايكون ذهبي بيكون شئ لذيذ :) لاتستغربين الميرانغ عازل قوي للايسكريم
راح يكون طبقة حامية له من الذوبان  D: لما يطلع من الفرن
دخليه الثلاجه لحد وقت التقديم النتيجه ايسكريم مع طبقة مقرمشة لذيذه .


*وممكن تسوين كوكيز مرانغ ثم تضيفين الايسكريم فوقه :)


*ممكن تحشينه باي حشوه تحبينها D:

*او ممكن تسوينه زي الماكرون 2 كوكيز مرانغ بينهم حشوه لذيذه D:
(ممكن تكون الحشوة ايس كريم D: )


ممكن ممكن ممكن راح اضل لين بكرة اقول ممكن ههههه افكار تعد ولاتحصى
ممكن تسوين منها المرانغ D: ابتكري واستمتعي ممكن تفشلين بس بعدين حتنجحين .

أخطاء تفسد المرانغ :

* الدهون .
* صفار البيض ولو كان قليل .
* الخفق الزائد عن حده .
* الصحن المستخدم .
* التوقف بكثره اثناء الخفق يعني تخفقين وتوقفين ثم تكملين خفق وتكون المده بينهم طويلة .



بس هذا كل شئ بالنسبه للمرانغ ....
المرانغ شئ جميل مكتشف من القرن 18 ! ياااه كان عندهم هالشغلات 
والمرانغ والحركات هاذي D: ههههههههه 
مفهوم المرانغ دخل على الشرق الاوسط بالقرن الاخير ومازلنا جاهلين فيه 
الى يومكم مادخل منازلنا بكثرة وماصرنا نستخدمه ونتفنن باستخدامه .
المرانغ اشوفه شئ واكتشاف خطير وجميل D: 
استخدمو المرانغ مع الكيك لو تبغين الكيكه تكون منتفشه زي ماسبق وقلت .

شكراً لكم ويعطيكم العافيه ..