تجربتي + مراحل العلاج من حروق الليزر | My Experiencen
*الصورتين من النت (صورة البشرة صورة تقريبية للحروق اللي جتني)
العلاج كان من سنة ٢٠١٠ الى ٢٠١٥
السلام عليكم ورحمة الله وبركاته
بدخل بالموضوع على طول حبيت اشارك معاكم تجربتي بحروق الليزر
لاني تمنيت جداً جداً جداً وقت ما احترقت اني اقرى تجربت أحد واختصر على نفسي مراحل علاج غير مفيدة اخذت من سنوات عمري ..
اتمني يفيدكم الموضوع
القصة /
في تاريخ من سنة ٢٠١٠ رحت لعيادتي اللي اسوي فيها الليزر وكانت خامس جلسه في ليزر الشعر .
اللي سوت لي الجلسة مع الاسف رفعت من درجة الجهاز إلى ١٤ بالرغم انه كانت اخر جلسه لي بدرجة١٠ ومفروض تمشي معاي بالتدريج يعني كان مفروض تحط لي ١١ بس حسبي الله ونعم الوكيل ..
الملاحظة الاولى / حسيت باحمرار غريب مو زي العادة ! كانت دوائر حمراء بيديني وفي خدودي في مناطق ثانيه بس اماكن محدودة ، اعظم شئ العضود والخدود ... ماشلت همها بالبداية توقعتها حساسية لان بشرتي حساسة .
الملاحظة الثانية / لما قرب موعد الرتوش بدت الدوائر تغمق ! خفت واستغربت لان ماقد صارت لي شئ غريب ، اول شئ طلبت من النيرس اللي تسوي لي الليزر انها تنادي الدكتورة . ولما شافتني الدكتورة ارتاعت وقامت تناظر وحسيت انها متوترة :( ثم قالت عادي شئ طبيعي ممكن ياخذ شهر ويروح ـ ياليت الدعوة شهر- كتبت لي كريم حروق وهذي كانت اول مرحلة بالعلاج .
- المرحلة الاولى (السنة الاولى) - فالعيادة - : كريم لعلاج الحروق الفائدة ٠٪ .
الملاحظة الثالثة / مر شهر واستعملت الكريم بس مافي فائدة كل اللي الاحظة انها قاعدة تغمق اكثر واكثر .
ما اقدر اوصف شعوري وقتها ، كان شعور مؤلم لدرجة عظيمه ، لاني رايحه للعيادة دلع ورفاهية بس مع الاسف طلعت منهم بمشكلة ما ادري ايش ابعادها .
بعد ماخلص الكريم ومر تقريباً شهر رحت للدكتورة مره ثانية وانا زعلانه وضايق صدري قالت لي عادي وشئ بسيط انتي بشرتك حساسة -كانت مع الاسف تحط اللوم علي وعلى بشرتي ، مع انه بعدين لما راجعوا الملف اكتشفوا ان الخطأ من النيرس واعتذروا مني بس ايش الفائدة - حاولت تهون الموضوع الدكتورة وتقولي قصص بنات صار لهم نفسي وراح بفترة قصيرة وحكي طويل كان يطمني بس مع الاسف كلام فارغ . بهذاك الوقت عطتني علاج ثاني ادعت انه هو الحل الامثل ؟؟
- المرحلة الثانية ( السنة الاولى ) - فالعيادة - : كريم تبيض وتقشير (فاشل لابعد الحدود الفائدة ٠٪ )
بالرغم ان الكريم كان جداً غالي سعره كان حول ٣٠٠ ريال لعبوة صغيرة جداً كنت اخلصها بإسبوعين ، وشريته مره ثانيه ولا فيه اي فائدة ملحوظة .
قعدت تقريباً ٣ شهور كذا بدون شئ ! موكله امري لله ، طبعاً موضوعنا مع العيادة ماسكت عنه ، رفعت شكوى لوزارة الصحة والتجاوب كان سريع الحمدلله ، اخذت منهم حقي بالرغم انه ماكان كافي للمصيبه اللي سووها بس احسن من اني اطلع منهم بدون شئ .
ودعتهم وانا كارهتهم لدرجة ان طريق خريص اللي هو طريقهم كرهته وصاير مشوؤم بالنسبة لي :/
عارفة ان علاجي عند العيادة ومع هالدكتورة كلام فاضي وماراح يجيب فائدة ، فقررت اني اطلع منهم ولا اكمل معاهم علاج رغم انهم وعدوني انهم يعالجوني .
اللحين صار وقت اني ابدأ مرحلة علاج حقيقية بمكان وعند دكتور ثقة ، رحت لمستشفى العسكري .
حجزت ورحت لاول موعد كانت جداً ايجابية الحمدلله عند الدكتور (رياض البقمي)
- المرحلة الثالثة (السنة الثانية ) - : تركيبة تبيض وتقشير ( فائدتها نسبيه ١٠٪ )
كشف علي دكتور رياض وكان جداً واضح معي قال الموضوع بيطول معاك محتاج منك صبر وتفاؤل .
اول شئ قاله لي : لاتسكتين على العيادة ، اشكي وخذي حقك . وهالشئ جداً مهم لان فيه ناس فعلاً يمشي عليهم لعب العيادات ، وحمدلله وزارة الصحة موجودة علشان تاخذ حقنا منهم .
بعدين قال انا بنبدأ معاك شوي شوي يعني ماراح نصدم البشرة بمقشرات قوية ، نسبة التقشير كانت بسيطة والتبييض ايضاً ، صرف لي تركيبه من المستشفى ، ماكانت ممتازة جداً بس قشرت بشرتي بشكل خفيف .
نبهني على شئ مهم مهم احطة حلق بإذني طول فترة العلاج وفعلاً مهمين جداً هم /
- واقي الشمس = بدون واقي راح ينقلب التبييض الى تسمير وبدل ماتكحلينها تعمينها .
- الترطيب ثم الترطيب ثم الترطيب = انتي جالسة تقشرين بشرتك فكيف تتركينها تتقشر بدون عناية وترطيب واهتمام بالمنطقة .
كان الموعد الثاني بعد ٤-٥ شهور تقريباً ، استعملت التركيبة لين خلصت .
رحت الموعد الثاني اللي بعده وصرفوا لي نفس التركيبة وكان الموعد ابعد لانه قال ارتاحي شهر وخلي بشرتك ترتاح من الكريم .
- المرحلة الرابعة (السنة الثالثة ) - : كريم مقشر ومبيض (كريم بيجمانورم الفائدة ٢٠٪ )
بالموعد الثالث قال لي بنغير التركيبة وصرف لي كريم بيجمانورم مقشر اقوى من التركيبة ، بس حرص على اني ما استعمله يومياً اول شئ قال اختبري بشرتك يمكن تتحسس فاول شئ كل ٣ ايام حطيه مره ثم حطيه يوم ايه يوم لا وشوفي نفسك ماشيه معاه او لا ثم جربي كل يوم وممكن تريحين البشرة يوم فالاسبوع .
ناسبني اني استعمله يوم ايه يوم لا
اول علاج كان فعال جداً ، يعني قشر بشرتي لدرجة تطيح قطع مني ومحيط العين تحسس جداً وحمر وقشر شوي .
كانت تجربه غريبه قشور وحساسية واحمرار وشئ غريب .
حمدلله فاد معي زي ماقلت ٢٠ ٪ بدت تخف الاثار .
خلال الموعد الرابع صرف لي نفس الكريم مره ثانية .
القفزة بالعلاج *
- المرحلة الخامسة (السنة الرابعة والخامسة ) - : (تركيبة ادمه تقشير وتبيض الفائدة نسبة ٨٠٪ )
رحت الموعد الخامس بالعسكري قالي الدكتور اقوي كريم تقشير عندنا هو بيجمانورم ولا فاد معاك مره فالحل اننا نزيد نسبة التقشير لك وتستعملين كريم اقوى من كذا فصرف لي تركيبة قال جيبيها من برا يصلحونها لك الصيدليات الكبيرة اللي تبع عيادة زي ديرما وادمه .
رحت ادمه وصلحت التركيبة كان سعرها ١٤٠ ريال بس الان رفعوا السعر الى ١٩٠ ريال
اول شئ لاحظته تقشير عميق جداً بس ماكان يوصل لعيني زي بيجمانورم بس صح يتقشر تحت عيني شوي بس مو قوي مره بالرغم انه يقشر اقوى واكثر من بيجمانورم ، بس مايمشي بالبشرة يقشر بالمنطقة اللي تحطين فيها الكريم .
خلصت اول علبة ، النتيجة جداً جداً جميلة وايجابية الحمدلله ، شعوري كان جداً رائع وجميل وحسيت ان وجهي بيرجع زي قبل ويديني بترجع مثل اول ..
الحمدلله ان الحروق ما اثرت على ثقتي بنفسي وكنت اطلع ولا اغطيها ابداً وقتها اصلاً عمري كان ١٥ سنة وكثير سألوني لما يشوفوني وش فيك وليش وجهك فيه بقع بنيه بس يارب لك الحمد ما اثر على ابداً .
رحت موعدي السادس قالي الدكتور كملي على نفس الكريم ، وكملت فعلاً جداً ممتازة النتيجة كل مره احسن من اللي قبل .
بالرغم ان الموعد السادس كان سئ الدكتور جداً الله يسامحه ، قال لي انك طولتي بالعلاج لك ٣ سنوات واكثر وانا انصحك توقفين علاج خلاص ريحي بشرتك مع السنوات راح بيخف . قلت له وشلون يعني يمكن خلاص كذا بيقعد بيدي ووجهي حروق ( الحروق خفقت مع التركيبة ولكن لسى فيه اثار ابيها تروح تماماً )! قالي الدكتور ايه الاثار هذا الباقيه عميقه جداً وماراح تروح ممكن مع السنوات تخف شوي شوي !! وقتها ما اوصف لكم شعوري . دموع دموع دموع .
لدرجة رجعت البيت واقول لاختي وش صار وانا اشاهق شهاق من الصياح ما اتخيل اني ممكن اقعد طوال عمري كذا خصوصاً في وجهي !! لا لا لا ،
حطمني الدكتور جداً جداً وكان جداً متشائم بس قلت له لا ابي اكمل علاج - والحمدلله اني قلت كذا وما استسلمت مع كلامه - قال خلاص كيفك كملي على تركيبة ادمه .
حطمني الدكتور جداً جداً وكان جداً متشائم بس قلت له لا ابي اكمل علاج - والحمدلله اني قلت كذا وما استسلمت مع كلامه - قال خلاص كيفك كملي على تركيبة ادمه .
الموعد السابع قال لي الدكتور ريحي بشرتك خلاص تعبت كم سنه تقشير خلاص ٦ شهور لاتستعملين شئ لين الموعد القادم .
الموعد الثامن قال لي ارجعي لتركيبة ادمه ، ورجعت لها والحمدلله نتائجها كانت ايجابيه جداً .
الموعد التاسع اخر موعد عطتني كريم تبييض وقال خلاص لعد ترجعين لنا لان حمدلله الحروق راحت بنسبة ٩٥٪ وفيه اثر جداً جداً جداً خفيف خصوصاً اليدين والحل كريم تبييض .
اذا فيك حروق لك مني ٤ نصائح :
* لاتسكتين عن حقك من العيادة .
* عالجي بسرعة ولا تستنين وروحي لعند دكتور ثقه .
* تفائلي تفائلي تفائلي ولاتستسلمي مهما طول العلاج انا حمدلله كنت راضية جداً ولا شلت هم الحروق او قلت ثقتي بنفسي لا بالعكس كنت متعايشه معها .
* خلي رفيقك بمرحلة العلاج واقي الشمس والترطيب .
اعتذر منكم مقدر اعطيكم تركيبة الكريم اللي من ادمه لانها مسؤولية علي ولا اقدر اتحملها ممكن ماتناسبكم ..
وادعي ربي دائماً انه يشفيك ويعافيك من الحروق ، لانه اللي الصار ابتلاء من الله ، وماراح يروح الا بأمر الله .
اخر شئ هنا بينت لكم قد ما اقدر كيف كان الحروق ، تمنيت اني صورت المراحل بنفسي بس ماجا على بالي ، فقربت الاثار قد ما اقدر ومراحل التغير بالفوتوشوب .
تلاحظون الاحمرار بالاولى واللون الغامق بالثانيه وخف بشكل بسيط فالثالثه وبشكل اقوى بالرابع والخامسة هي المرحلة اللي حصل فيها تغير عظيم الحمدلله .
الان بعد تقريباً ٧ سنوات الحمدلله دائماً وابداً بشرتي رجعت نفس أول ولا فيه أي أثر للحروق يااارب لك الحمد والشكر ..
يارب يكون افادكم الموضوع وشاركوه مع اي احد يحتاجة ..
أحبكم و اتمنى لكم جمال دائم وبشرة نضرة ياجميلات .
الحمد لله على سلامتك .. انا كان فيني اثار قرصات حشرات جلست في جسمي 3 سنين يمكن وعالجتها عند العسكري بكريمات تتركب في الصيدلية بعد وراحت بعد 6 شهور علاج الحمد لله ..
ردحذفالله يسلمك ياقلبي والحمدلله على سلامتك
حذفالحمدالله على سلامتك ايش هي التركيبة الله يسعدك رحت دكتورة عطتني مبيض فقط 💔هذا حسابي في الانتسجرام الله يجزاك الجنة beshw2000 وماعندي احد في العسكري عشان اروح له
حذفأزال المؤلف هذا التعليق.
ردحذفياقلبي انتي والله تذكرت حالي وانتي تذكرين القصه ممكن انتي اصعب مني بالوجة انا عندي اسفل الذقن وممكن انا اصعب منك لان حروقي في كل جسمي تقريبا ! اسفل الذقن وكامل اليدين والذراعين والساقين والافخاذ والاندر ارمز !! �� حسبي الله ونعم الوكيل فيهم ... لي ٣ شهور اتعالج من اثار الحروق �� ورافعه عليهم شكوى في وزارة الصحه لانهم شوهوني والاه ! ودي اعرف تفاصيل اكثر عن الشكوى في وزارة الصحه كيف اشتغلتي عليها ؟
ردحذفومن كثر ما اروح واجي لوزارة الصحه
شفت قصص اشكال والوان .. تشيب الراس
بعدها فتحت حساب خاص لقضيتي وكنت ابي اوصلها رأي عام
اكن اكتشفت ان كثير كثير ارسلوا لي باننا ماكنا ندري ان لنا حق تعويض من الحروق وانها تكون تحت بند " الاخطاء الطبية " ... تخيلي طلعوا من العيادة بعلاجات للحروقب٣٠-٤٠ ريال ، واغلبها مافاد ومازالت الحروق فيهم من سنوات !!
فحولت حسابي من قضيه تخصني الى حساب دفاع عن الاخطاء الطبية ..
حسابي ع الانستقرام positivedose1
حسابي ع سناب تشات positivedose
لازم كلنا يد بيد نوقف ضد النصب والاحتيال وجشع مثل هالمراكز التعبانه ��
تكفين ودي اعرف تفاصيل الشكوى في وزارة الصحه واكون لك من الشاكرين
شكراً لك على مبادرتك اولاً وفعلاً فعلاً كثير ناس يتغافلون ولا ياخذون حقهم وهذا اللي مخلي هالمراكز والعيادات مازالت موجودة وتوظف ناس ماعندهم خبره ولما يحرقونا يكون التعويض ولا شئ لان محد يطالب بحقه ..
حذفحبيبتي انا وابوي الله يحفظه كتبنا خطاب ورقي كامل بالقضيه واسم العيادة وموقعها والقصة كاملة واضفنا رقم ملفي في العيادة والتاريخ والوقت بالضبط للجلسة اللي انحرقت منها وكان الخطاب موجه لوزير الصحة وطبعاً ضروري تضيفين بالخطاب بياناتك كامله اسمك الكامل ورقم هويتك وتاريخ ميلادك وغيره .. اطبعي الخطاب وحطيه بظرف وارسليه عبر البريد لوزارة الصحة ، وقتها كان الحمدلله التجاوب سريع اتوقع في اسبوع اتصلوا على ابوي وقالوا احنا عند العيادة حابة تاخذون تعويض مباشر منهم وبالاتفاق معاهم او يكون التعويض تقديري من الوزارة من خلال فحص طبي ..
شكراً
الحمدلله انك مااستسلمتي لليأس حبيت انك كملتي علاجك والحمدلله استفدتي والعيادة حسبي الله عليهم اللي يحطون ناس ماتفهم بأماكن جداً جداً حساسه انا سبق مريت بتجربه نفسك بس خفيفه والحمدلله ماكملت الجلسه حسّيت انها رافعه الدرجه بزيادة طلبت منها تقصر وانو اللي دايم تسوي لي تحط اقل من هالدرجه رفضت قمت قلت لها وقفي شغل وطلعت عنها طبعاً حرقت لي كم حرقه كذا صغار بالذراع واشتكيت الادارة عليها وطلع كل الناس تشتكي عليها وغيروها حسبي الله وكفى ، سورى حكيت قصة حياتي وربي اني تعاطفت معك وحبيت ثقتك بنفسك آهنيك والحمدلله ع سلامتك ������
ردحذفذكرتيني انا وقتها كنت احس بألم شديد وجداً يضايقني ولكن تحملت وصبرت الله يهديني ولا قلت لها تخفض الحرارة الا عند الرجول قلت لها قصرتي جداً حار ولكن تحملت الحراراة بوجهي ويديني :( الحمدلله على كل حال وماندري وش الخيره من هالامر كله ..
حذفحسبي الله عليهم ألف مره لاحول ولاقوة الا بالله
لا تذكريني بالألم 😭😭💔 ، ماقول الا حسبي الله ونعم الوكيل عليهم الف مره ، تخيلي يوم جيتهم ابي علاج للحروق كان يصادف جلسه رتوش ، الدكتوره عندها مواعيد مهيب فاضيه تقابلني .. قلت انا اهم انا محترقه !! قالت خل تروح تسوي رتوش وتجيني عقب !! اخيلي تبيني اسويرتوش فوق الحروق !!! حسبي الله ونعم الوكيل بكل شخص معدوم الضمير
حذفحبيبتي انتي الله يسعدك ويحفظك ، اشكر لك تجاوبك السريع ، انا بصراحه ماكنت اعرف التفاصيل ، فكلمت محامي هو وجهني وقالي اول شي تقدمين بلاغ عن طريقة ٩٣٧ ، وتعطينهم نبذة مختصره من شكواك مع بياناتك وبيانات المركز بعدها وزارة الصحه تحول البلاغ للشؤون الصحية في منطقتك ، وتروحين تكتبين شكواك خطياً مع كل اثباتاتك الي عندك وتدينهم ، وبعدها باسبوع كذا يرسلون لجنة تحقيق للمركز يحققون معهم ويشوفون ملفك عندهم ويحققون مع الدكتورة المعالجة والمركز كامل ولم ثبت ادانتهم ، يقولون لهم خلصوا موضوعكم ودياً مع صاحبة الشكوى عاد حزتها تعالي شوفي الازعاج الي بيجك من المركز ، وبيحاولون يسكتونك بالقليل ! جلسه تقشير ع مادري ايش بس لازم الوحدة فينا تعرف ان لها حق قانوني ، مبلغ تعويض كبير مو شي بسيط ع حسب مكان الحرق والمساحه ... وطبعا هنا تكون الكورة في ملعبك .. اطلبي الي تشوفينه يردلك اعتبارك ويبرد قلبك فيهم .. ماتجاوبوا معك ؟ حوليها للقضايا .. وهنا تتحول القضيه للمحكمة ويحكم فيها الشي وفيها اجرائات اخرى ، اهمها انهم يعرضونك على لجنة طبية يقيمون حالتك .. والله يكتبلنا ولك خير ❤
ردحذفاول شي الف الحمدلله على سلامتك حبيبتي الاء ثاني شي والي استغربت منه كيف سويتي ليزر وانتي بعمر صغير اصلن كيف العياده اسمحت لانها تسويه لك انتي كنتي بمرحلة تغير الهرمونات لو اصابك شي كبير بسم الله عليك الله لايقوله ولكنن رجع ونقول الحمدلله على سلامتك والحمدلله على حاجه سهلها ربي لك وعافاك,, وتذكري اننا نحبك بجميع الاحوال ...
ردحذفانا نفس المشكلة صارت معي وحاليا اعاني منها صرلي ٣ اسابيع وبتعالج عند طبيب ومع لاسف لعيادة ماعترفو بخطأ طبي منهم وحرام هيك اطباء يكملو لازم يسحبو منهم شهادتهم لانهم لايفهمون بطب شي همهم جمع لمال
ردحذفروعه الموضوع و يفيد كثير من البنات بس اذا ممكن تقولين لنا افضل مستشفيات تسوي جلسات ليزر
ردحذفشكرا اختي على ما قدمتيه لنا عن تجربتك.والله أعاني من نفس المشكلة .عملت ليزر تقشير.كان عندي شوية آثار حبوب.وياريت ماعملتها.تركلي آثار حروق وتصبغات.وهذا من سنة 2014.ولأن مازلت اغاني منها.والله ما أتحمل شوف نفسي بالمراية.يعني هل طرقة علاجك تفيدني.علما اني رحت على دكتورين وماشجعوني.انا في قمة الياس.
ردحذفماتتحملي تشوفي نفسك؟ ليه؟
حذفالشئ لما تفكري فيه بزيادة حيلفت نظرك وبتشوفينه بطريقة سلبيه مو مثل ما الناس تشوفه، توكلي على الله وخلي ثقتك بنفسك عالية، الموضوع بسيط والطب تطور وفيه دكاترة كويسين انتي بس احجزي موعد وروحي وشوفي الدكتور اللي يقنعك وترتاحين له.
الحمد لله على السلامه حاسة فيك لاني للأسف سارت فيا بس مو حروق بسبب اني شلت شعر حروق لاني سويت ليزر لعلاج الكدمات انا سويته وللأسف ما كان عندي خلفيه كامله عن الموضوع وانه ابحث عن دكتور كويس وكذا رحت عند دكتور جلديه وشفت عندة جهاز ليزر وقلتله تسوي جلسات ليزر قال ايوه وعلى طول بنفس اليوم حطلي كريم مخدر لوجهي وسوالي ليزر وقال الجلسه الجايه أقل شي شهر روحت البيت وكان مكانها مرااا احمر قالي لاتتغرضي للشمس ابدا وحطي واقي شمس لمدة ٣ايام المهم جلست بالظلام كأني خفاش بعد ٣ايام بدأ يروح بعض الأماكن بس في أماكن ما راح بالعكس زاد اللون سواد ما اهتميت لأنه قالي احتمال يسمر بعدين يفتح طبيعي (انا سويتها في اليمن فاحتمال انه الدكتور مو كويس) المهم رجعت عندة بعد شهر لأنه كنا راجعين وقتها على السعوديه قلتله انه في بعض الأماكن ساار سمرا في وجهي مرااا ووريته طلعني انا الغطانه قال كل اللي سويتلهم محد سارله ايش معنا انتي وانتي اتعضتي للشمس ومدي ايشش وانا مالي دخل قلتله ايش اللي مالك دخل قالي خلاص خلاص بسيطه بتروح بعد فتره الجلد بجدد نفسه ومدري ايش وكتبلي على كريم اشتريته تقريبا ١٥٠ ريال(هو لمن سوالي الليزر غير القوه على كل بقعه غير فالمكاان اللي قواه ماتحمل البشره وساب اثار مكانه) لمن رجعت جدة رحت عند دكتور جلديه بمستشفى الجدعاني قالي انه الكريم ماله اي فايدة وكتبلي ادويه ومدري ايشش كثيير بس ما فادني فسرت اسوي تقشيير في البيت على البقع وفادني ادعولي اني اتخلص من آثار الحروق وإذا تعرفون دكتور كويس اروحله دلوني الله يعطيكم العافيه (خف مني بنسبه ٥٠ بالميه)
ردحذفايش اسم الدكتور اللي بالعسكري الله يعافيك ضروري
ردحذفكاتبه اسمه ، اقري كل الكلام بتلقينه
حذفانا صارلي حروق دحين بالليزر ومر عليا شهر
ردحذفكيف اروح لادمة؟ 😭😭😭😭
دقي عليهم
حذفطيب سؤال هل كريم avomeb مفيد لحروق الليزر؟ لاني استعملت كريمات كثير ومقشرات لحروق الليزر ومافادت بس هذا الكريم يوم احطه على حرق او اشيل شعري واحطه مره حلو.. فيدوني اذا احد قد جربه لحرق ليزر
ردحذفانا مو دكتورة جلدية ولا اعرف عزيزتي، فقط نقلت تجربة للفائدة.
حذفراجعي دكتور
انا احترق جسمي تكفوون اللي تعرف دكتور ششاااطر يقول
ردحذفووش الانسب لآثار حروق الليزر ( الكريمات او التقشير او ايش ؟
انا كذا حرقت من الليزر المنزلي اثار برجلي م شفتها الا لما بسوي الجلسه الثالثه وزواجي قريب 😭💔
ردحذفعادي وسعي صدرك الحمدلله مو شئ عظيم او تشوه، والاثار بتروح بتروح اذا ربي كتب وكان عندك عزيمه وصبر واصرار.
حذفانا انحرقت من بعد ٧ جلسه والدكتوره ايش تقولي تخيلو الليزر مايعمل حروووق انهيار حسبي الله عليها الي تعرف شي يشيل الحرق تكتب بالله مع العلم اللي برجولي بدت تروح اما بطني وظهري لسع غامق مكان الحرق ماخف صرفتلي كيو في الموف ولا فاد
ردحذفحسبي الله عليهم يبغون يشيلون التهمه عنهم
حذفشنو الحل لحرق نتيجة الليزر في Internal vaginal blades تغير اللون للغامق ومرت سنه كامله وما في تغيير ياريت إلى يعرف يجاوب لأن أثرت في الحالة النفسية جدا
ردحذفالحمدالله على سلامتك انا عندي حرق في ساقي الاثنين وابكي منها وواجعني قلبي ممكن تركيبة تعطينيها على الانستجرام هذا حسابي beshw2000
ردحذفوالله ذي الحروق مشكلتها مشكلة استغفرالله انا انحرقت من مقشر احماض فواكه استخدمته بالبيت في ظهري وحطيت كريم لمدة سنة وخف شوي وبعدين استخدمت صابونة كوجي سان واختفى تدريجيا واللحين الله يهديني ويثبتني حطيت المقشر في ساقي الاثنين وانحرقت في ساقي الاثنين ووشكله مطول ماهو رايح الله يجزاك الجنة التركيبة لانه شكله مطوووووول الحرق
حذفأنا سويت امس وخططت جسمي بقلم تحديد شفاه واستغربت وعملت ليزر حرفيا بعدها بساعه من الجلسه جسمي كله خطوط حمراء والم واليوم صديد رجعت لها قالت الغلط من الممرضه اول مره تسوي بقلم وعطتني كريم ميبو وكريم الاسد وحاسه بالالم وصديد ينزل من يدي وبطني وظهري وساقي
ردحذفايش تنصحوني ارجع اشكي المركز او اروح لعياده ثانيه اتعالج
ردحذفلو سمحتي عباره عن ايش تركيبة ادمه ؟ ابي اعرف التراكيز حق الكريم اللي خذيتيه
ردحذف